ووردوقلاریم اوچدو
چوخ درس اوخوماقدان سیخیلمیشدیم، بئینیم دورولسون دئیه صوفی چایی قیراغینا گئتدیم، اؤزوم‌له ده بیر کتاب آپاردیم. کتابین بیرازینی اوخویونجا قارانلیق دوشدو؛ چیراق یانینا چکیلیب هوسله قالانینی اوخوماغا باشلادیم. هاوانین رنگی دییشینجه اطرافیمدا کی دوروم دا عوضله‌نیردی.
مؤعتادلارین مینقیلداماسی ایله میلچک‌لرین سانجماسی منی کتابین فیکریندن آییریردی. نئجه ایدیسه کیتابی اوخویوب بیتیردیم. ساهات ۹-و کئچمیشدی، ائوه قاییتماغا دوشونوب آیاغا قالخدیم. ائله بیلدیم شهره قارانلیق دوشندن غیر‌قانونی ایشلر ده چوخالیب. سنتی مؤعتادلار کؤهنه دووارلار دیبینده قدیم کی یوللارلا نعشه اولماغا چالیشسالار دا بیر سیرا یئنی یئتمه جاوانلار( قیزلی اوغلانلی) ماشینلاری‌نین ایچینده خمارلیغین قابیرقاسینی سیندیریردیلار. او حالدا ایکن قویو چکن ماشینلاردان بیری یوکونو صوفو چایینا بوشالداندا گؤردوم. بونلارین هامیسی آیاغا دوروب ائوه طرف گئده‌نه‌جن باش توتدو. دئمک ایسته‌دییم بو ایدی کی قانون چرچیوه‌سینه سیغمایان ایشلر هله دوام ائدیردی. بونلاری بئینیمده نه قدر سالدیم-چیخدیم هئچ بیر نتیجه الده ائتمه‌دیم. چئوره‌نی اؤلدورمک، شهرین قیراق-بوجاغیندا ماواد چکمک...
هر حالدا یولا دوشدوم دیژبانی قاباغیندا ایکی چالا وار؛ درین‌ایدیلر. ایکی اوجا دووار، چالالارین دؤره‌سینی آلمیشیدی. آنجاق دووارلار بیر دوزه دئییل، آرا-سیرا قیریق-قیریق ایدیلار. یانی ایکی مئتیردن بیر، بیر مئتیر دووار ایشله‌نمه‌میشدی. ساللانا-ساللانا دووارین یانیندان کئچیردیم. ایکی کیشی قورازا بیر پئیکانین دال صاندیغیندان تلیس-تلیس زیر-زیبیل بئل‌لرینه چاتیب، دووارلارین دیبینه بوشالدیردیلار. منی گؤروب، اؤزلرینی سایمازلیغا ووردولار. من ایسه یانلاریندان سس‌سیز سوزولدوم. آج ایدیم. هئچ بیلمیردیم قارنیمین هایینا قالیم یا او ایکی کیشی‌نین آنلامازلیغینا فیکیرله‌شیم... یول اوزونو هر نه‌یه فیکیرله‌شیردیم... آخی من اولارا تای دئییلدیم. خیامدان گیلاس‌لیغین دار کوچه‌سینه قالخدیم. بئش اون دنه سیقار آلیب، بیرینی آلیشدیردیم. سونرا توکاندان باییرا چیخیدیم. بیردن ایکی تَرک‌لی بیر موتور آز قالدی منی آلتینا آلسین. من پالچیق دووارا سیخیلدیم. اؤزومو سایمامازلیغا ووروب نئچه آددیمی کئچیب تئزلیکجه ائوه یئتیشمه‌یی دوشوندوم... کوچه‌میزین آغزیندا همن موتورچولا تَرکینده کی دانیشیردیلار. چاخیر قوخوسو آغیزیلاریندان باسیردی. اونسوز دا آپ-آیدین ایدی؛ ْکئفلی ایدیلر. بیر_بیرلرینه قارداش، نؤکرم، سن جان ایسته و بونا تای بیر-بیرینه قوربان گئتمه‌لری اولدوقجا گولونج گلیردی منه. آنجاق اولاردان قورخدوغوما گؤره گولمه‌ییمی اوغورلادیم. قاپییا چاتدیم. ایچه‌ری تپیلیب، تیررندیم حیطین اورتاسینا.. مؤعتادلار دئمیشکن: ووردوغوم کؤکوندن اوچدو. دئمه‌لی چای قیراغیندا سویون سسی‌له اوخودوغوم ادبی متنین لذتی باشیمدان اوچدو..
